- ਇੰਦਰਜੀਤ ਸਿੰਘ, ਕਾਨਪੁਰ
ਕੇਂਟ ਵਾਲੀ ਪਾਰਕ ਵਿੱਚ ਸੈਰ ਕਰਦਿਆਂ ਮੈਨੂੰ ਅੱਜ ਅਣਖੀ ਮਿਲ ਗਇਆ । ਵੈਸੇ ਵੀ ਉਹ ਸੈਰ ਕਰਦਿਆਂ ਤੁਰਦਾ ਘੱਟ, ਤੇ ਹੱਥ ਪੈਰ ਬੁਹੁਤੇ ਮਾਰਦਾ ਹੈ । ਮੈ ਉਸ ਨਾਲ ਥਕ ਕੇ ਪਾਰਕ ਦੀ ਬੈੰਚ ਤੇ ਬਹਿ ਗਇਆ। ਇਧਰ ਉਧਰ ਦੀਆ ਗੱਲਾਂ ਅਤੇ ਹਾਲਚਾਲ ਪੁਛਣ ਤੋਂ ਬਾਦ ਮੇਰੇ ਕੰਨ ਕੋਲ ਮੂਹ ਲਿਆ ਕੇ ਬੋਲਿਆ, "ਵੀਰਾ ਜੀ, ਕੋਈ "ਡਿਗਰੀ" ਤਾਂ ਨਹੀਂ ਬਨਵਾਉਣੀ ? ਕੋਈ ਅਵਾਰਡ ਤਾਂ ਨਹੀਂ ਜੇ ਚਾਹੀਦਾ ?ਮੈਂ ਹੈਰਾਨ ਹੋ ਕੇ ਪੁਛਿਆ ਵੀਰਾ, ਕੀ ਤੂੰ ਕਿਸੇ ਯੂਨੀਵਰਸਿਟੀ ਵਿੱਚ ਦਲਾਲੀ ਦਾ ਕੰਮ ਸ਼ੁਰੂ ਕਰ ਦਿਤਾ, ਜਾਂ ਕਿਸੇ ਦੋ ਨੰਬਰੀ ਨਾਲ ਤੇਰਾ ਕੋਈ ਸਾਂਝ ਭੁਜਾਲੀ ਹੋ ਗਈ, ਜੋ ਡਿਗਰੀਆਂ ਦੀ ਗਲ ਕਰ ਰਿਹਾ ਹੈ ? ਇਸ ਉਮਰ ਵਿੱਚ ਤਾਂ ਬੰਦਾ ਪੜ੍ਹ ਕੇ ਪੁਖਤ ਹੋ ਜਾਂਦਾ ਹੈ । ਹੁਣ ਤੁੰ ਕੇੜ੍ਹੀਆਂ ਡਿਗਰੀਆਂ ਅਤੇ ਅਵਾਰਡਾਂ ਦੀ ਗਲ ਕਰ ਰਿਹਾ ਹੈ ? ਬੁਡ੍ਹੇ ਵਾਰੇ ਹੁੰਣ ਮੈਨੂੰ ਕੇੜ੍ਹੀ ਡਿਗਰੀ ਦੀ ਜਰੂਰਤ ਹੈ?
ਅਣਖੀ ਅਪਣੇ ਲਹਿਜੇ ਵਿੱਚ ਕਹਿਣ ਲਗਾ, ਵੀਰਾ ਜੀ ਹੱਲੀ ਤੁਹਾਡੀ ਕਿਨੀ ਕੁ ਉਮਰ ਹੋ ਗਈ ? ਕੀ ਤੁਸੀ ਫਖਰੇ ਕੌਮ ਨਾਲੋ ਵੱਧ ਬੁਡ੍ਹੇ ਹੋ ? ਉਸ ਨੂੰ ਤਾਂ ਨਾਂ ਕੁਝ ਕੰਨੋਂ ਸੁਣੀਦਾ ਹੈ ਅਤੇ ਨਾਂ ਕੁਝ ਠੀਕ ਤਰ੍ਹਾਂ ਦੀਦਾ ਹੈ, ਤੁਸੀ ਤਾਂ ਹਲੀ ਬਿਨਾਂ ਐਨਕ ਦੇ ਲਿਖੀ ਪੜ੍ਹੀ ਜਾਂਦੇ ਹੋ ? ਮੱਕੜ ਨਾਲੋਂ ਤੁਸੀ ਬਹੁਤੇ ਬੁਡ੍ਹੇ ਹੋ ਗਏ ਹੋ ਕੀ ? ਉਸ ਦੇ ਗੋਡਿਆਂ ਦੀ ਗ੍ਰੀਸ ਵੀ ਮੁੱਕ ਗਈ ਹੈ, ਉਸ ਕੋਲੋਂ ਤਾਂ ਤੁਰਿਆ ਵੀ ਨਹੀਂ ਜਾਂਦਾ। ਤੁਸੀ ਤਾਂ ਹੱਲੀ ਦੋ ਚਾਰ ਕਿਲੋਮੀਟਰ ਰੋਜ ਸੈਰ ਵੀ ਕਰਦੇ ਹੋ ? ਪਿਪਲੀ ਵਾਲੇ ਨਾਲੋਂ ਕੀ ਤੁਸੀ ਬਹੁਤੇ ਵਡੇਰੇ ਹੋ ? ਉਸ ਦਾ ਢਿਡ ਤਾਂ ਤੰਦੂਰ ਵਾਂਗੂ ਬਾਹਰ ਨੂੰ ਆ ਗਇਆ ਹੈ, ਤੁਸੀ ਤਾਂ ਹੱਲੀ ਠੀਕ ਠਾਕ ਦਿਸਦੇ ਹੋ।
ਅਣਖੀ ਦੀ ਸਾਰੀ ਗਲ ਮੇਰੀ ਸਮਝ ਆ ਗਈ ਸੀ। ਲਗਦਾ ਸੀ ਕਲ ਵਾਲੀ ਅਖਬਾਰ ਉਸਨੇ ਪੜ੍ਹ ਲਈ ਸੀ, ਜਿਸ ਵਿੱਚ ਮੱਕੜ ਨੂੰ "ਅਕਾਲੀ ਫੂਲਾ ਸਿੰਘ ਅਵਾਰਡ " ਦੇਣ ਵਾਲੀ ਖਬਰ ਛੱਪੀ ਸੀ। ਸ਼ਾਇਦ ਉਸਨੇ ਅਪਣੇ ਦਿਲ ਦੀ ਭੜਾਸ ਕਡ੍ਹਣ ਲਈ ਹੀ ਮੇਰੇ ਨਾਲ ਇਹ ਗੱਲ ਛੇੜੀ ਸੀ। ਮੈਂ ਉਸਦੇ ਸੁਭਾਅ ਤੋਂ ਬਹੁਤ ਚੰਗੀ ਤਰ੍ਹਾਂ ਵਾਕਿਫ ਹਾਂ। ਭਾਵੇਂ ਉਸ ਦੀ ਗਲ ਕਰਨ ਦਾ ਢੰਗ ਮਜਾਕੀਆਂ ਅਤੇ ਵਿਨੋਦੀ ਸੁਭਾਅ ਵਾਲਾ ਲਗਦਾ ਹੈ, ਲੇਕਿਨ ਉਸ ਦੀ ਗਲ ਵਿੱਚ ਸੁਨੇਹਾ ਬਹੁਤ ਗੰਭੀਰ ਅਤੇ ਪੰਥ ਦਰਦ ਨਾਲ ਭਰਿਆ ਹੁੰਦਾ ਹੈ।ਪੂਰਾ ਨਾਮ ਉਸਦਾ ਅਣਖੀਲਾ ਸਿੰਘ ਹੈ , ਸਾਰੇ ਉਸ ਨੂੰ ਅਣਖੀ ਕਹਿ ਕੇ ਬੁਲਾਂਦੇ ਹਨ।
ਮੈਂ ਅੰਜਾਨ ਬਣਦਿਆਂ, ਥੋੜਾ ਜਿਹਾ ਮੂਹ ਬਣਾਂ ਕੇ ਉਸ ਕੋਲੋਂ ਪੁਛਿਆ, "ਵੀਰਾ ਸਵੇਰੇ ਸਵੇਰੇ ਕਿੱਨ੍ਹਾਂ ਲੋਕਾਂ ਦਾ ਨਾਮ ਲੈ ਰਿਹਾ ਹੈ ਤੂੰ ? ਤੈਨੂੰ ਕੋਈ ਹੋਰ ਚੱਜ ਦਾ ਬੰਦਾ ਨਹੀਂ ਸੀ ਮਿਲਿਆ ? ਸਾਰਾ ਦਿਨ ਇਨ੍ਹਾਂ ਦੀਆਂ ਹੀ ਗੱਲਾਂ ਹੁੰਦੀਆਂ ਨੇ, ਸਵੇਰੇ ਸਵੇਰੇ ਤਾਂ ਇਹੋ ਜਹੇ ਬੰਦਿਆ ਦੀ ਗਲ ਕਰਕੇ ਮੂਡ ਖਰਾਬ ਨਾਂ ਕਰਿਆ ਕਰ। ਫਿਰ ਮੇਰੀ ਤੁਲਨਾਂ ਤੂੰ ਇਨਾਂ ਲੋਕਾਂ ਨਾਲ ਕਿਉ ਕਰ ਰਿਹਾ ਹੈ ?
ਨਹੀਂ ਵੀਰ ਜੀ, ਮੈਂ ਸੱਚ ਕਹਿ ਰਿਹਾ ਹਾਂ। ਅੱਜ ਕਲ ਕੌਮ ਵਿੱਚ ਕਈ ਧੂਤਿਆਂ ਨੂੰ ਖੁਲ ਕੇ ਡਿਗਰੀਆਂ ਅਤੇ ਅਵਾਰਡ ਮਿਲ ਰਹੇ ਨੇ। ਬਾਦਲ ਵੀ ਲੈ ਗਇਆ "ਫਖਰੇ ਕੌਮ ਦਾ ਅਵਾਰਡ", ਮੱਕੜ ਵੀ ਲੈ ਗਇਆ "ਅਕਾਲੀ ਫੂਲਾ ਸਿੰਘ" ਦਾ ਅਵਾਰਡ। ਉਹ ਦੋ ਟਕੇ ਦਾ ਧੂੱਮਾ ਵੀ ਲੈ ਆਇਆ ਬਾਬਾ ਦੀਪ ਸਿੰਘ ਅਵਾਰਡ .....ਗਲ ਪੂਰੀ ਕਰਦਿਆਂ ਕਰਦਿਆਂ ਹੀ ਉਸ ਨੇ ਧੂੰਮੇ ਨੂੰ ਦੋ ਤਿਨ ਚਰਿਤ੍ਰੋ ਪਾਖਿਯਾਨ ਵਾਲੀ ਗਾਲ੍ਹਾਂ ਕਡ੍ਹ ਮਾਰੀਆਂ । ਸੀਤਾਰਾਮ ਰਾਧੇ ਸਿਆਮ ਦਾ ਕੀਰਤਨ ਕਰਨ ਵਾਲਾ ......ਨੀਲਧਾਰੀਆਂ ਤਾਂ ਬੜਾ ਗਲੇਮਰਸ ਅਵਾਰਡ ਲੈ ਗਇਆ ਹੈ। ਉਸ ਨੂੰ ਤਾਂ "ਰਾਜਾ ਜੋਗੀ" ਦੇ ਅਵਾਰਡ ਨਾਲ ਸਨਮਾਨਿਆ ਗਇਆ ਹੈ। ਗਲ ਕਰਦਿਆ ਕਰਦਿਆਂ, ਸਵੇਰੇ ਸੈਰ ਕਰਨ ਵਾਲੇ ਦੋ ਤਿਨ ਹੋਰ ਵੀਰ ਅਣਖੀ ਅਤੇ ਮੈਨੂੰ ਵੇਖ ਕੇ ਆਣ ਖਲੋਤੇ ਸੀ। ਅਣਖੀ ਜਿਥੇ ਵੀ ਗੱਲਾਂ ਕਰਦਾ ਹੋਵੇ, ਉਸ ਦੀਆਂ ਰੋਚਕ ਅਤੇ ਵਿਨੋਦੀ ਸੁਭਾਅ ਵਾਲੀਆਂ ਗੱਲਾਂ ਸੁਨਣ ਲਈ ਅਪਣੇ ਆਪ ਨੂੰ ਕੋਈ ਰੋਕ ਨਹੀਂ ਪਾਂਦਾ।
ਮੈਂ ਹਲੀ ਵੀ ਅਨਜਾਣ ਬਣਦਿਆਂ ਉਸ ਨੂੰ ਕਹਿਆ, "ਵੀਰਾ, ਪੜ੍ਹਿਆ ਤਾਂ ਮੈਂ ਵੀ ਹੈ ਕਿ, ਇਨਾਂ ਨੂੰ ਇਹ ਅਵਾਰਡ ਮਿਲੇ ਹਨ । ਲੇਕਿਨ ਵੀਰਾ ਅਵਾਰਡ ਤਾਂ ਕਿਸੇ ਬਹੁਤ ਵਡੇ ਪੰਥਿਕ ਯੋਗਦਾਨ ਲਈ ਦਿਤੇ ਜਾਂਦੇ ਹਨ। ਇਨਾਂ ਨੇ ਕੇੜ੍ਹੀ ਕੁਰਬਾਨੀ ਕੀਤੀ ਹੈ ਕੌਮ ਲਈ, ਜੋ ਇਨਾਂ ਨੂੰ ਇਨੇ ਵੱਡੇ ਵੱਡੇ ਅਵਾਰਡ ਮਿਲ ਰਹੇ ਹਨ ?
ਅਨਣਖੀ ਅਪਣੇ ਲਹਿਜੇ ਵਿੱਚ ਕਹਿਣ ਲਗਾ, ਤੁਸੀ ਇਨੇ ਭੋਲੇ ਨਾਂ ਬਣੋ, ਵੀਰਾ ਜੀ। ਤੁਹਾਨੂੰ ਸਭ ਕੁਝ ਪਤਾ ਹੈ ਕਿ ਕੌਮ ਲਈ ਇਨਾਂ ਨੇ ਕੀ ਕੀਤਾ ? ਇਸ ਸਿਆਸਤ ਦਾਨ ਨੇ ਬਲੂ ਸਟਾਰ ਵੇਲੇ ਹੱਥ ਖੜੇ ਕਰ ਕੇ ਮਿਲਟਰੀ ਦੀ ਜੀਪ ਵਿੱਚ ਬਹਿ ਕੇ ਅਪਣੀ ਜਾਣ ਬਚਾਈ ਸੀ। ਇਹ ਦਲੇਰੀ ਅਤੇ ਸਿਆਨਪ ਹਰ ਕਿਸੇ ਵਿੱਚ ਤਾਂ ਨਹੀਂ ਹੋ ਸਕਦੀ ? ਉਸ ਵੇਲੇ ਬੱਚ ਗਇਆ ਤਾਂ ਹੀ ਤਾਂ ਅੱਜ ਰਾਜ ਕਰ ਰਿਹਾ ਹੈ । ਜੇੜ੍ਹੇ ਸ਼ਹੀਦ ਹੋ ਗਏ ਉਨਾਂ ਨੂੰ ਕੌਮ ਵਿੱਚ ਕੋਈ ਪੁੱਛਣ ਵਾਲਾ ਵੀ ਨਹੀਂ ਹੈ। ਰਾਮ ਰਹੀਮ ਅਤੇ ਆਸ਼ੂਤੋਸ਼ ਦੇ ਪ੍ਰੋਗ੍ਰਾਮ ਕਰਵਾਉਣ ਲਈ ਸਾਰਾ ਅਮਲਾ ਲਾ ਦੇਂਦਾ ਹੈ, ਅਤੇ ਸ਼ਹੀਦ ਭਾਈ ਜਸਪਾਲ ਸਿੰਘ ਦੇ ਕਾਤਿਲਾਂ ਨੂੰ ਹਵਾ ਤਕ ਨਹੀਂ ਲਗਣ ਦਿੱਤੀ। ਬ੍ਰਾਹਮਣਾਂ ਨੂੰ ਅਪਣਾਂ ਪੂਜਨੀਕ ਕਹਿੰਦਾ ਹੈ ਅਤੇ ਜੇਲ ਵਿੱਚ ਬੰਦ ਮਰਜੀਵੜੇ ਸਿੱਖ ਇਸ ਦੀ ਨਜਰ ਵਿੱਚ ਅੱਤਵਾਦੀ ਨੇ। ਸ਼ੱਕੀ ਕਿਰਦਾਰ ਵਾਲੇ ਧੂੱਮੇ ਨੂੰ ਅਪਣਾਂ ਸਿਆਸੀ ਭਾਈਵਾਲ ਬਣਾਂ ਕੇ ਉਸ ਕੋਲੋਂ ਨਾਨਕ ਸ਼ਾਹੀ ਕੈਲੰਡਰ ਕਤਲ ਕਰਵਾਇਆ । ਇਹ ਆਏ ਦਿਨ ਸਿੱਖੀ ਦਾ ਬੇੜਾ ਗਰਕ ਕਰੀ ਜਾ ਰਿਹਾ ਹੈ, ਹਿੰਦੂ ਸਿੱਖ ਭਾਈਚਾਰੇ ਦੀ ਦੁਹਾਈ ਦੇ ਕੇ ਸਿੱਖਾਂ ਨੂੰ ਅਪਣੇ ਵਾਂਗ ਹਿੰਦੂ ਬਣਾਂ ਰਿਹਾ ਹੈ। ਇਸ ਤੋਂ ਵੱਧ ਪੰਥ ਦਰਦ ਹੋਰ ਕਿਸ ਵਿੱਚ ਹੋ ਸਕਦਾ ਹੈ ਮੇਰੇ ਵੀਰੋ ? ਇਸ ਦਾ ਦੇਣਾਂ ਨਹੀਂ ਦੇ ਸਕਦੀ ਕੌਮ । ਹੋਰ ਕਿਸ ਨੂੰ ਦੇਣਾਂ ਸੀ ਤੁਸੀ "ਫਖਰੇ ਕੌਮ ਦਾ ਅਵਾਰਡ" ? ਹੈਂ ਕੋਈ ਇਸ ਤੋਂ ਕਾਬਿਲ ਬੰਦਾ, ਤੁਹਾਡੇ ਕੋਲ ?
ਮੈਂ ਮੁਸਕੁਰਾਂਦਿਆਂ ਉਸ ਨੂੰ ਕਹਿਆ, ਅਣਖੀ ਵੀਰਾ ਚੱਲ ਉਹ ਤਾਂ ਬਹੁਤ ਵੱਡਾ ਸਿਆਸਤ ਦਾਨ ਹੈ, ਮੱਕੜ ਨੇ ਕੇੜ੍ਹੀ ਤਲਵਾਰ ਜਾਂ ਤੋਪ ਚਲਾਈ ਜਾਂ ਯੁੱਧ ਜਿਤਿਆ ਹੈ ਜੋ ਉਸ ਨੂੰ ਅਕਾਲੀ ਫੂਲਾ ਸਿੰਘ ਅਵਾਰਡ ਦਿਤਾ ਗਇਆ ।
ਮਕੜ ਦਾ ਨਾਮ ਸੁਣਦਿਆ ਹੀ ਉਸ ਦੀਆਂ ਵੱਡੀਆਂ ਵੱਡੀਆਂ ਮੁੱਛਾ ਤਣ ਗਈਆਂ ਤੇ ਗੁੱਸੇ ਨਾਲ ਕਹਿਣ ਲੱਗਾ। ਵੀਰਾ ਤੂੰ ਸਭ ਕੁਝ ਜਾਂਣਦਾ ਹੈ, ਤੂੰ ਮੇਰਾ ਮਜਾਕ ਨਾਂ ਬਣਾਂ। ਮੈ ਉਸ ਨੂੰ ਕਹਿਆ, "ਵੀਰਾ ਤੇਰੀ ਗਲ ਠੀਕ ਹੈ , ਕਿ ਮੈਂ ਇਹ ਸਭ ਜਾਂਣਦਾ ਹਾਂ, ਲੇਕਿਨ ਤੇਰੇ ਮੂਹੋ ਸੁਨਣ ਦਾ ਮਜਾ ਹੀ ਕੁਝ ਹੋਰ ਹੈ ।ਫਿਰ ਇਹ ਵੀਰ ਵੀ ਤਾਂ ਪੂਰੀ ਗਲ ਤੇਰੇ ਕੋਲੋਂ ਸੁਨਣ ਲਈ ਹੀ ਤਾਂ ਖੜੇ ਹਨ।
ਇਹ ਸੁਣ ਕੇ ਅਣਖੀ ਬੋਲਿਆ, "ਵੀਰਾ, ਅਪਣੇ ਮਾਲਿਕ ਪ੍ਰਤੀ ਇਸ ਦੀ ਵਫਾਦਾਰੀ ਦੀ ਮਿਸਾਲ ਅਜੋਕੇ ਸਮੈਂ ਅੰਦਰ ਦੂਜੀ ਕੋਈ ਹੈ ਹੀ ਨਹੀਂ । ਜਿਵੇ ਇਸ ਦਾ ਮਾਲਿਕ ਕਹਿੰਦਾ ਹੈ ਉਵੇ ਹੀ ਇਹ ਕਰਦਾ ਹੈ।ਪਹਿਲਾਂ ਇਸ ਨੇ ਅਪਣੇ ਮਾਲਿਕ ਦੇ ਕਹਿਣ ਤੇ ਨਾਨਕ ਸ਼ਾਹੀ ਕੈਲੰਡਰ ਦਾ ਕਤਲ ਕਰ ਦਿਤਾ। ਫਿਰ ਇਸ ਨੇ ਡਾਲਰ ਕਾਲੇਜਾਂ ਕੋਲੋਂ ਸਲੇਬਸ ਮੰਗਵਾ ਕੇ ਇਕਸਾਰ ਕਰ ਦਿਤਾ। ਹੁਣ ਇਕ 90 ਵਰ੍ਹਿਆਂ ਦੇ ਵਿਦਵਾਨ ਕੋਲੋਂ ਸਿੱਖਾਂ ਦਾ ਇਤਿਹਾਸ ਲਿਖਵਾ ਰਿਹਾ ਹੈ। ਮੈਂ ਤਾਂ ਸੁਣਿਆ ਹੈ 70 ਵਰ੍ਹਿਆਂ ਤੋਂ ਬਾਦ ਤਾਂ ਬੰਦਾ ਸੱਤ੍ਹਰ ਬੱਹਤਰ ਜਾਂਦਾ ਹੈ , ਇਹ 90 ਵਰਿਆ ਦਾ ਵਿਦਵਾਨ ਪੰਜ ਸੌ ਸਾਲਾਂ ਦੀ ਗਲ ਕਿਸ ਤਰ੍ਹਾਂ ਯਾਦ ਕਰਕੇ ਲਿਖ ਸਕਦਾ ਹੈ? ਚਾਰ ਸੌ ਸਾਲ ਪੁਰਾਨਾ ਇਤਿਹਾਸਕ ਗੁਰਦੁਆਰਾ ਥੜਾ ਸਾਹਿਬ ਇਸਨੇ ਤੁੜਵਾ ਦਿਤਾ । ਦਰਬਾਰ ਸਾਹਿਬ ਦੀ ਡਿਉੜ੍ਹੀ ਦੇ ਇਤਿਹਾਸਕ ਦਰਵਾਜੇ ਕਬਾੜ ਵਿੱਚ ਤੁੜਵਾ ਕੇ ਸੁੱਟ ਦਿਤੇ। ਹੁਣ ਇਸ ਤੋਂ ਵੱਡਾ ਦਲੇਰ, ਅਤੇ ਆਪਹੁਦਰਾ ਪ੍ਰਧਾਨ ਤੁਹਾਨੂੰ ਹੋਰ ਕਿਥੋਂ ਮਿਲੇਗਾ? ਇਹੋ ਜਹਿਆ ਬਲਿਦਾਨ ਅਤੇ ਬਹਾਦੁਰੀ ਅਤੇ ਕੌਮ ਲਈ ਯੋਗਦਾਨ ਹੋਰ ਕਿਸ ਨੇ ਕੀਤਾ ਹੈ, ਅਜ ਤਕ ? ਇਸ ਦੇ ਗੋਡਿਆਂ ਦੀ ਗ੍ਰੀਸ ਭਾਵੇ ਮੁੱਕ ਗਈ ਹੈ, ਲੇਕਿਨ ਇਸ ਦੀ ਕਾਰ ਦੀ ਟੰਕੀ ਦਾ ਪੇਟ੍ਰੋਲ ਕਦੀ ਨਹੀਂ ਮੁਕਦਾ । ਇਕ ਸਾਲ ਵਿੱਚ 2 ਕਰੋੜ ਦਾ ਪੇਟ੍ਰੋਲ ਖਰਚ ਕਰਨ ਵਾਲਾ ਪ੍ਰਧਾਨ ਤੁਹਾਨੂੰ ਹੋਰ ਕਿਥੇ ਮਿਲਣਾਂ ਹੈ। ਮੈਂ ਤਾਂ ਸੁਣਿਆ ਹੈ ਇਕ ਕਾਰ ਵਿੱਚ ਇਨਾਂ ਪੇਟ੍ਰੋਲ ਖਰਚ ਕਰਨ ਵਾਲੇ ਰਿਕਾਰਡ ਲਈ ਇਸ ਨੂੰ 'ਗਿਨਿਸ ਬੁਕ ਆਫ ਰਿਕਾਰਡ' ਵਾਲੇ ਲਭ ਰਹੇ ਨੇ,ਲੇਕਿਨ ਇਹ ਉਨਾਂ ਤੋਂ ਛੁਪਦਾ ਫਿਰ ਰਿਹਾ ਹੈ, ਕੇ ਇਹ ਗਲ ਦੱਬੀ ਘੁੱਟੀ ਰਹੇ ਤਾਂ ਚੰਗਾ ਹੈ। ਇਸ ਨੂੰ ਅਵਾਰਡ ਨਾਂ ਦੇਂਦੇ ਤੇ ਹੋਰ ਕਿਸ ਨੂੰ ਦੇਣਾਂ ਸੀ।
ਜੁਗਿੰਦਰ ਨੇ ਚੁਟਕੀ ਲੈੰਦਿਆ ਅਣਖੀ ਨੂੰ ਉਕਾਸਾਇਆ ਤੇ ਕਹਿਆ "ਅਣਖੀ ਵੀਰਾ ਉਹ ਤੀਜਾ ਕੌਣ ਹੈ ਜਿਸਨੂੰ "ਰਾਜਾ ਜੋਗੀ" ਦੀ ਡਿਗਰੀ ਮਿਲੀ ਹੈ?
ਅਣਖੀ ਬੋਲਿਆ , ਵੀਰਾ ਸਾਡੀ ਕੌਮ ਵਿੱਚ ਇਹੋ ਜਹੇ ਸੰਤ, ਬ੍ਰ੍ਹਮਗਿਆਨੀ ਅਤੇ ਮਹਾਪੁਰਖ ਆਰ. ਐਸ. ਐਸ. ਵਾੜਦਾ ਹੈ, ਜਾਂ ਅਕਾਸ਼ ਤੋਂ ਪ੍ਰਗਟ ਹੁੰਦੇ ਦੇ ਨੇ, ਇਹ ਤਾਂ ਕਰਤਾਰ ਹੀ ਜਾਂਣੇ । ਇਸ ਧੂੱਮੇ ਨੂੰ 15 ਵਰ੍ਹੇ ਪਹਿਲਾਂ ਕੌਣ ਜਾਂਣਦਾ ਸੀ? ਇਸ ਦਾ ਕੌਮ ਪ੍ਰਤੀ ਕੀ ਯੋਗਦਾਨ ਹੈ ? ਧੂੱਮੇ ਨੂੰ ਫਿਰ ਚਰਿਤ੍ਰ ਪਾਖੀਆਨ ਵਾਲੇ ਗੰਦੇ ਗੰਦੇ ਫੱਕੜ ਤੋਲਦਾ ਹੋਇਆ ਕਹਿਣ ਲੱਗਾ .......ਅਚਾਨਕ ਹੀ ਇਹ ਅਰਸ਼ਾਂ ਤੋਂ ਕੌਮ ਦੇ ਵੇੜ੍ਹੇ ਵਿੱਚ ਕਿਥੋਂ ਆਣ ਡਿਗਿਆ ਅਤੇ ਸੰਤ ਨਾਮ ਦੇ ਸਮਾਜ ਦਾ ਮੁੱਖੀ ਬਣ ਕੇ ਕੌਮ ਦੀ ਛਾਤੀ ਤੇ ਚੜ੍ਹ ਗਇਆ। ਇਸੇ ਤਰ੍ਹਾਂ ਕਲ ਤਕ ਰਾਧੇ ਸਿਆਮ, ਸੀਤਾ ਰਾਮ ਦਾ ਕੀਰਤਨ ਕਰਨ ਵਾਲਾ , ਇਕ ਨੀਲੀ ਜਹੀ ਲੀਰ ਬਨ੍ਹਣ ਵਾਲਾ ਪੂੰਜੀਪਤੀ ਬੂਬਨਾਂ ਕੌਮ ਦੇ ਵੇੜ੍ਹੇ ਵਿੱਚ ਅਚਾਨਕ ਪ੍ਰਗਟ ਹੋਇਆ, ਤੇ ਅਚਾਨਕ ਹੀ "ਚੱਨ ਤੋੜਾਂ ਲਾ ਕੇ "ਰਾਜਾ ਜੋਗੀ" ਬਣਾਂ ਕੇ ਪੇਸ਼ ਕਰ ਦਿਤਾ ਗਇਆ । ਧੁੰਮੇ ਨੇ ਨਾਨਕ ਸ਼ਾਹੀ ਕੈਲੰਡਰ ਸੋਧਿਆਂ, ਹੁਣ ਇਸ ਨੀਲੀ ਲੀਰ ਵਾਲੇ ਨੇ ਆਉਣ ਵਾਲੇ ਸਮੇਂ ਅੰਦਰ ਪਤਾ ਨਹੀਂ ਕੀ ਕੀ ਸੋਧਨਾਂ ਹੈ। ਅੰਮ੍ਰਿਤਸਰ ਅਤੇ ਪਟਨੇ ਵਾਲੇ ਗ੍ਰੰਥੀ ਦਾ ਇਸ ਤੇ ਬਹੁਤ ਵੱਡਾ ਕਿਰਪਾ ਭਰਿਆ ਹੱਥ ਹੈ।
ਕੋਲ ਹੀ ਖੜੇ ਇਕ ਵੀਰ ਨੇ ਮਜਾਕ ਕਰਦਿਆਂ ਅਣਖੀ ਨੂੰ ਕਹਿਆ "ਤੂੰ ਉਲਟਾ ਕਹਿ ਰਿਹਾ ਹੈ ਅਣਖੀ ਵੀਰਾ, ਇਸ ਉਤੇ ਇਂਨਾਂ ਗ੍ਰੰਥੀਆਂ ਦਾ ਹੱਥ ਨਹੀਂ, ਬਲਕਿ ਇਨਾਂ ਗ੍ਰੰਥੀਆਂ ਉਤੇ ਪੀਪਲੀ ਵਾਲੇ ਦਾ ਹੱਥ ਹੈ। ਸੁਣਿਆ ਹੈ ਇਹ ਥਾਈਲੈੰਡ ਅਤੇ ਸਿੰਗਾਪੁਰ ਦਾ "ਰਾਜਾ" ਹੈ, "ਜੋਗੀ" ਤਾਂ ਇਹ ਕਿਸੇ ਪਾਸਿਉ ਨਜਰ ਨਹੀਂ ਆਂਉਦਾ।ਇਹ ਵੀ ਸੁਣਿਆਂ ਹੈ ਕੇ ਇਕ ਤਖਤ ਦੇ ਜਫੇਮਾਰ ਦੇ ਪੰਜਾਬ ਵਿੱਚ ਬਣ ਰਹੇ ਮਾਲ ਵਿੱਚ ਇਸਦਾ ਵੀ ਕਾਫੀ ਪੈਸਾ ਲੱਗਾ ਹੈ। ਇਸ ਕੋਲ ਅਥਾਹ ਪ੍ਰਾਪਰਟੀ, ਪੈਸਾ ਅਤੇ ਸੋਨਾਂ ਹੈ ਦੇਸ਼ ਅਤੇ ਵਿਦੇਸ਼ਾਂ ਵਿੱਚ । ਜੱਫੇਮਾਰ ਤਾਂ ਇਸੇ ਲਈ ਇਸ ਦੇ ਮਗਰ ਜੀਭ ਕਡ੍ਹ ਕੇ ਪੂੰਛ ਹਿਲਾਂਦੇ ਫਿਰਦੇ ਨੇ, ਇਨਾਂ ਨੇ ਅਵਾਰਡ ਪਿਪਲੀ ਵਾਲੇ ਨੂੰ ਨਹੀਂ ਦੇਣਾਂ ਤਾਂ ਤੇਰੇ ਵਰਗੇ ਇਮਲੀ ਵਾਲੇ ਨੂੰ ਦੇਣਾਂ ? ਪਟਨੇ ਵਾਲਾ ਵੀ ਇਸ ਤੇ ਬਹੁਤ ਮੇਹਰਬਾਨ ਹੈ। ਸੁਣਿਆ ਉਸ ਨੇ ਇਸ ਦੀ ਘਰਵਾਲੀ ਨੂੰ "ਰਾਣੀ ਮਾਤਾ" ਅਤੇ ਇਸ ਦੇ ਪੁੱਤਰ ਨੂੰ "ਭਾਈ ਸਾਹਿਬ" ਦਾ ਅਵਾਰਡ ਤੱਖਤ ਪਟਨਾਂ ਸਾਹਿਬ ਵਲੋਂ ਵੀ ਦਿਤਾ ਹੈ ? ਕਲ ਨੂੰ ਇਨਾਂ ਨੇ ਅਪਣੇ ਨਵੇ ਲਿਖਾਏ ਜਾ ਰਹੇ ਇਤਿਹਾਸ ਵਿੱਚ ਇਸ ਨੀਲ ਧਾਰੀ ਦੀ ਘਰਵਾਲੀ ਨੂੰ ਹੀ ਖਾਲਸੇ ਦੀ ਮਾਤਾ ਬਣਾਂ ਦੇਣਾਂ ਹੈ। ਮਾਤਾ ਸਾਹਿਬ ਕੌਰ ਜੀ ਨੂੰ ਫਿਰ ਕਿਸਨੇ ਯਾਦ ਕਰਨਾਂ ਹੈ ? ਹਜੂਰ ਸਾਹਿਬ ਵਾਲੇ ਨੇ ਤਾਂ ਇਸ ਨੂੰ ਗੁਰੂ ਘਰ ਤੋਂ ਨੀਲੇ ਦੀ ਨਸਲ ਵਿੱਚੋਂ ਇਕ ਘੋੜਾ ਦੇ ਕੇ ਵੀ ਇਸਨੂੰ ਸਤਕਾਰਿਆ ਹੈ ?
ਉਸ ਵੀਰ ਦੀ ਇਹ ਗਲ ਸੁਣ ਕੇ ਅਣਖੀ ਜਾਂਣ ਲਈ ਉਠ ਖਲੋਤਾ ਤੇ , ਤੁਰਦਾ ਤੁਰਦਾ ਗੰਭੀਰ ਹੋ ਕੇ ਕਹਿਣ ਲਗਾ, "ਠੀਕ ਕਹਿ ਰਿਹਾ ਹੈ ਤੁੰ ਵੀਰਾ। ਗੁਰੂ ਘਰ ਦਾ ਘੋੜਾ ਤਾਂ ਦੂਰ ਦੀ ਗਲ ਹੈ , ਇਨਾਂ ਤਖਤਾਂ ਦੇ ਗ੍ਰੰਥੀਆਂ ਨੂੰ ਜੇ ਮੋਟਾ ਲਿਫਾਫਾ ਮਿਲੇ ਤਾਂ ਇਹ ਗੁਰੂ ਘਰ ਦੀ ਹਰ ਚੀਜ ਵੇਚ ਸਕਦੇ ਹਨ । ਸੇਲ ਲਗੀ ਹੈ, ਵੀਰਾ ਸੇਲ, ਗੁਰੂ ਘਰ ਦਾ ਘੋੜਾ ਨਹੀਂ ਦਰੀਆਂ, ਬਾਲਟੀਆਂ , ਬਾਟੇ, ਰੁਮਾਲੇ, ਚੰਦੋਏ, ਢੋਲਕੀਆਂ, ਚਿਮਟੇ, ਗੋਲਕਾਂ ਇਹ ਸਭ ਕੁਝ ਵੇਚ ਸਕਦੇ ਨੇ। ਕੌਮ ਜੇ ਇਸੇ ਤਰ੍ਹਾਂ ਅਵੇਸ੍ਹਲੀ ਅਤੇ ਸੁੱਤੀ ਪਈ ਰਹੀ, ਤਾਂ ਇਨਾਂ ਨੇ ਪੰਥ ਵਿਰੋਧੀਆਂ ਦੇ ਹੱਥ, ਗੁਰੂ ਦਾ ਘਰ ਵੀ ਵੇਚ ਖਾਂਣਾਂ ਹੈ । ਇਨਾਂ ਕਹਿ ਕੇ ਉਹ ਘਰ ਨੂੰ ਤੁਰ ਪਿਆ ।
ਅੱਜ ਅਣਖੀ ਮਜਾਕੀਆ ਮੂਡ ਵਿੱਚ ਉੱਕਾ ਹੀ ਨਹੀਂ ਸੀ। ਪੰਥ ਦਰਦ ਤੇ ਉਸ ਵਿੱਚ ਕੁਟ ਕੁਟ ਕੇ ਭਰਿਆ ਹੋਇਆ ਹੈ। ਜਿਨੀਆਂ ਵੀ ਗਲਾਂ ਉਹ ਕਰਦਾ ਹੈ, ਉਸ ਵਿੱਚ ਕੋਈ ਨਾਂ ਕੋਈ ਸੰਦੇਸ਼ ਜਰੂਰ ਹੁੰਦਾ ਹੈ। ਸਾਰਿਆਂ ਇਕ ਦੂਜੇ ਨੂੰ ਫਤਿਹ ਬੁਲਾਈ ਤੇ ਅਪਣੇ ਘਰਾਂ ਵਲ ਤੁਰ ਪਏ। ਲੇਕਿਨ ਅਣਖੀ ਦੀਆਂ ਗੱਲਾਂ ਹਮੇਸ਼ਾਂ ਵਾਂਗ ਮੇਰੇ ਮੰਨ ਦੀਆਂ ਗਹਿਰੀਆਂ ਤਕ ਉਤਰ ਗਈਆਂ ਸੀ। ਉਸ ਦੇ ਉਹ ਬਚਨ ਮੈਨੂੰ ਵਾਰ ਵਾਰ ਹਲੂਣਾਂ ਦੇ ਰਹੇ ਸੀ.... ਕੌਮ ਜੇ ਇਸੇ ਤਰ੍ਹਾਂ ਅਵੇਸ੍ਹਲੀ ਅਤੇ ਸੁੱਤੀ ਪਈ ਰਹੀ, ਤਾਂ ਇਨਾਂ ਨੇ ਪੰਥ ਵਿਰੋਧੀਆਂ ਦੇ ਹੱਥ, ਗੁਰੂ ਦਾ ਘਰ ਵੀ ਵੇਚ ਖਾਂਣਾਂ ਹੈ ......।
